Dainang Pangintubu

Loja do ho Inang parmudu-muduhon hami
Sian bortianmi nunga dihaojahon ho hami
Dimeme, diparidi, diparabiti ho hami
So suang dope lojam sian hauma
Ikkon loja dope ho dung sahat tu jabu alani hami
Ditinggang udan, didadang las ni ari gunom tu gambo
Ido ngolum siapari holan pasari-sari hami
Tung so diboto hodo ungut-ungut saleleng on
Sandok gogom sude dilehon ho lao manarihon hami
Dipasingkolahon ho do hami sian sasude gogom
Nang pe naung ditinggalhon damang parsinuan i
Sasada ho do manarihon hami
tarlumobi hami nadua siampudan mon

Sipata do ra male siubeonmi di tonga sabai
Alai sai dinunuti ho do namangula i
Asa adong panganon nami sude gellengmon
Sia ma hami boras ni bortian mi
Lima ma nuaeng na mangolu dope
Torop do pinomparmu sian hami
Anggiat ma i pinompar siboan goar tau hasangapon mu ale Inang

Saonari di hatuaon mon, sipata do manetek ilungki
Dang tarbahen hami akka gellengmon pasonanghon rohami
Di hatuaon mon nunga lam gale pamatang mi ale Inang
Tangan mu na gogo mangula i nunga marhesuk
Patmu na ringgas mardalan tu hauma i nunga marmet-met

Dang boi huompa hami ho arian borngin
Songon nabinaenmu tingki pagodang-godanghon hami
Dang tarsulangan hami ho Inang ganup manogot
Songon nabinaenmu tu hami tingki dakdanak
Dang tinggil be sipareonmu
songon tikki hametmeton nami
tinggil umbege tangis nami, tangi umbege pangidoan nami
Nunga hurang torang parnidaanmu
dang songon tikki manogu-nogu tangan nami asa unang tarrobung
Nunga lam nanget soaram Inang pangintubu
dang songon tikki si hadakdanakon nami
Tangkas soarami mamodai hami
Asa boi pantun marpangalaho,
jala asa unang manimbil sian dalan na suman
Nambur sogot ni ari ditas-tas ho doi Inang
Hirang di simajujungmi dok-dok so dihilala ho Inang
Gadong do isini hirang mi, lao baen tugo nami di arian na
Dung mulak sian parsikkolaan andorang so tu hauma
Maheu do ho sipata Inonghu
Molo sipata dang huoloi hami nanidokmi
Dung saonari pe husadari angka pambaenan nami i
Inang pangintubu, aut naung godang sinamot hu
Dang pola songon on ilu-ilungku
Nang pe tangkas huboto, dang apala sinamot i na palashon roham
Aha ma na tau baenonhu tu ho Inang
Dang tardok au Anakmu Siampudan on
Tangkas do nian huboto, dang olo ho mangido sian hami
Alai tung beha pe dainang,
songon akka endei mandok,'
napuran sangkababa pe nian atik boi lehononku
Inang Pangintubu,
Pagogo ma tangiangmi
Lam padoras mangidohon tu Tuhan i
Anggiat lam tamba pansamotan di au Siampudan mon
Nanggo apala didai ho natabo sian au
andorang di ngolumon dope
Hata nijolmai, tangis di sihabunian mekkel di sihapataran do au dainang